Mokabat sa 40 ka mga lungsod sa Cebu ang nagpaandar na sa ilang Price Monitoring Councils, sumala ni Gobernor Pamela Baricuatro. Base kini sa report ni Mayor Cesar Suan, presidente sa League of Municipalities of the Philippines (LMP) Cebu Chapter.
Ang maong lakang gihimo aron mas mapalig-on ang pagmonitor sa presyo sa mga palaliton ug masiguro nga gisunod sa mga negosyante ang suggested retail price (SRP), labi na karon nga adunay kabalaka tungod sa kagubot sa Middle East.
Matod ni Gob. Baricuatro, ang probinsya, kauban ang mga ahensya sama sa Department of Trade and Industry, Department of Agriculture, Department of Energy, Department of Health ug Department of Environment and Natural Resources, maghatag og updated SRP matag Huwebes aron mahimong giya sa mga lokal nga gobyerno.
Naghangyo usab ang gobernador sa mga negosyante nga dili palabi sa pagpasaka sa presyo sa ilang baligya aron dili malisdan ang katawhan.
Gipasabot usab niya nga igo ra ang supply sa bugas ug gasolina sa Cebu sa mosunod nga mga bulan, busa wala’y angay ikabalaka o panic buying.
Gipasidaan sa gobernador nga aksyunan sa Capitol ang mga negosyanteng molapas sa Price Act, sama sa hoarding ug sobra nga pagpataas sa presyo, ug mahimo silang kasuhan o kanselahon ang ilang business permit.
Source: Cebu Province PIO
I via Renante Socia Lada