Mabulukon ug makalingaw ang selebrasyon atol sa nasudnong pagsaulog sa ika-51 nga Nutrition Month nga gipahigayon sa Barangay Hall, Sta. Filomena niadtong Hulyo 14, 2025.
Ang maong kalihokan usa ka panaghiusa sa Barangay Council ug sa City Government of Dipolog nga nagtumong sa pagpasiugda sa kahinungdanon sa husto nga nutrisyon ug mga himsog nga batasan sa pagkaon.
Gitambongan kini nila City Councilor Hon. Kenny Ong, City Nutrition Acting Officer Ms. Riza Jane Zamoras, ug Punong Barangay Kap. Marlon Mejares, kauban ang ubang mga opisyal sa barangay.
Sa iyang mensahe, gipasiugda ni Councilor Ong ang papel sa komunidad ug pamilya sa pagduso sa nutrisyon ug kahimsog, ilabi na alang sa kabataan.
Gisuportahan kini ni Kap. Mejares ug nagpasalamat sa katawhan sa ilang aktibong partisipasyon sa mga programa sa barangay.
Naglakip ang selebrasyon og mga aktibidad sama sa feeding program, nutri quiz, ug mga intermission number sa kabataan aron mapalambo ang kahibalo sa maayong pamatasan sa pagkaon.
Ang kalihokan usa ka paningkamot sa barangay aron mapalapdan ang kahibalo ug pagdasig sa katawhan sa importansya sa nutrisyon isip pundasyon sa lig-on nga panglawas ug malambuong komunidad.(Jumalisa Papa)
Source: Dipolog City Government