Gilunsad sa City Government of Dapitan pinaagi sa City Health Office (CHO) niadtong Septiyembre 21, 2026 ang Bakuna Eskwela School-Based Immunization (SBI) Program, aron mapaduol ang libre ug importanteng bakuna sa mga estudyante sa siyudad.
Gisugdan ang kalihukan pinaagi sa motorcade sa dagkong kadalanan sa Dapitan nga gisalmotan sa mga health worker, ug gisundan dayon sa unang vaccination rollout sa Dapitan City Central School.
Gipangulohan ni City Health Officer Dr. Jidda B. Chan, target sa CHO nga mahuman sulod sa duha ka semana ang vaccination activities sa tanang public elementary ug secondary schools sa Dapitan.
Ubos sa programa, ang mga kwalipikadong estudyante makadawat og libre nga bakuna batok sa mga sakit sama sa measles, rubella, tetanus, diphtheria, ug human papillomavirus (HPV).
Ang Grade 1 learners hatagan og Measles-Rubella (MR) vaccine, samtang ang Grade 7 learners makadawat og Tetanus-Diphtheria (Td) vaccine. Ang kwalipikadong Grade 4 female learners hatagan usab og HPV vaccine, nga makatabang sa pagpanalipod batok sa mga sakit nga mahimong mosangpot sa cervical cancer.
Kabahin ang Bakuna Eskwela sa padayong paningkamot sa City Government of Dapitan, ubos sa pagpangulo ni Mayor Evelyn “Belen” T. Uy, sa paghatod sa importanteng serbisyong panglawas nga mas duol sa matag batang Dapitanon.(IKEN B. GULLEM)
Source: Dapitan City Government