Dili lamang paghatag og livelihood assistance ang tumong sa Provincial Government of Zamboanga del Norte, kundili ang pagtabang sa mga benepisyaryo nga makabaton og malungtarong tinubdan sa kita, trabaho, ug oportunidad alang sa pagpalambo sa ilang mga negosyo.
Mao kini ang gipasiugda sa probinsyal nga pangagamhanan pinaagi sa pagpalig-on sa koordinasyon sa nagkalain-laing opisina ug ahensya sa gobyerno ubos sa bag-ong Provincial Livelihood and Economic Empowerment Technical Working Group (PLEE-TWG).
Gipahigayon niadtong Setyembre 22 ang inisyal nga meeting sa Conference Room sa Office of the Provincial Governor aron hisgutan ang implementasyon sa bag-ong Executive Order nga nagtukod sa PLEE-TWG, lakip ang komposisyon, mga gimbuhaton, ug responsibilidad sa mga miyembro niini.
Ubos sa pagpangulo ni Gobernador Darel Dexter T. Uy, gitumong sa inisyatiba nga mas magkahiusa ang mga programa sa probinsya ug nasyonal nga mga ahensya alang sa livelihood, employment, skills development, enterprise development, ug uban pang economic interventions.
Ang mas koordinadong pamaagi gilauman nga makatabang sa paglikay sa pagdoble-doble sa mga programa ug pagsiguro nga ang suporta sa gobyerno motakdo sa tinuod nga panginahanglan ug kapasidad sa mga benepisyaryo.
Dili usab kutob sa paghatag og initial assistance ang gitan-aw sa PLEE-TWG. Lakip sa mga mekanismo nga gilatid sa Executive Order ang regular nga pag-monitor sa kahimtang ug progreso sa mga benepisyaryo aron masuta kung ang mga intervention nakatabang ba sa pagdugang sa kita sa panimalay, pagpalig-on sa panginabuhian, pagbaton og trabaho, ug pagpalambo sa ilang kagawasan gikan sa padayon nga pagsalig sa government assistance.
Pinaagi niini, ang mga programa sa nagkalain-laing opisina ug ahensya mahimong mas konektado. Ang skills training, pananglitan, mahimong iugnay sa aktuwal nga panginahanglan sa industriya o negosyo; ang production support mahimong iapil sa market linkage; ug ang livelihood assistance mahimong sundan og technical support ug monitoring aron mas dako ang posibilidad nga molungtad ang panginabuhian.
Ang regular nga monitoring maghatag usab og oportunidad sa gobyerno nga mahibal-an kung unsang mga intervention ang epektibo ug asa kinahanglan usbon o dugangan ang suporta.
Sa katapusan, ang tumong sa PLEE-TWG mao ang paghimo og mas organisado ug sustainable nga sistema sa livelihood ug economic empowerment sa Zamboanga del Norte—usa ka pamaagi diin ang government assistance dili lamang mahimong temporaryong tabang, apan mahimong lakang padulong sa mas lig-on nga panginabuhian, trabaho, ug oportunidad alang sa mga pamilya sa probinsya.(IKEN B. GULLEM)
Source: Zamboanga del Norte Provincial News Network