Nakadawat og bag-ong oportunidad sa trabaho ang mga jobseeker ug lokal nga mga trabahante atol sa 67th Araw ng Salug Job Fair nga gipahigayon niadtong Setyembre 21, 2026.
Giorganisar ang job fair pinaagi sa panagtambayayong sa Local Government Unit of Salug ug Department of Labor and Employment – Zamboanga del Norte Field Office, uban sa partisipasyon sa mga employers nga nangita og mga kwalipikadong aplikante.
Pinaagi sa maong kalihokan, direktang nakig-atubang ang mga jobseeker sa mga potensyal nga employers ug nakakuha og higayon nga maka-apply sa lain-laing job openings.
Gipakita usab sa job fair ang importansya sa koordinasyon tali sa lokal nga pangagamhanan, mga ahensya sa gobyerno, employers, ug komunidad aron mas mapalapad ang access sa trabaho ug income opportunities alang sa mga residente.
Gilauman nga ang mga oportunidad nga gitanyag pinaagi sa job fair mahimong makatabang sa mga aplikante sa ilang pagpangita og trabaho ug mahimong unang lakang padulong sa mas lig-on nga panginabuhian.(IKEN B. GULLEM)
Source: Municipality of Salug