Gipanalanginan sa Local Government Unit sa Gutalac ang bag-ong grader nga napalit pinaagi sa 5% Local Disaster Risk Reduction and Management Fund o LDRRMF alang sa tuig 2026, isip kabahin sa pagpalig-on sa kahandam sa lungsod batok sa mga kalamidad.
Gipangulohan ni Mayor Eddie Justin Quimbo ang maong kalihokan niadtong Hunyo 22, diin gipasiugda ang kahinungdanon sa bag-ong kagamitan sa pagpaspas sa mga trabaho sa pag-ayo ug pagmentinar sa mga dalan ug uban pang imprastraktura sa lungsod.
Gilauman nga makatabang usab ang grader sa mas episyenteng pagtubag sa mga emerhensya ug mga sitwasyon nga may kalabutan sa kalamidad, ilabi na sa mga lugar nga nanginahanglan dayong rehabilitasyon.
Matud sa LGU, ang pag-angkon sa maong kagamitan kabahin sa padayon nga paningkamot sa paghatag og mas maayong serbisyo ug pagpalig-on sa kapasidad sa Gutalac alang sa mas luwas ug mas andam nga komunidad.(JENIFFER JR. DELICA)
Source: LGU-Gutalac Public Information