Mikabat sa 170 ka pasyente ang nakabenepisyo sa libreng medical check-up nga gipahigayon sa Zamboanga del Norte Medical Center (ZNMC) Outpatient Department niadtong Septiyembre 24, 2026, isip kabahin sa programa sa provincial government aron mapaduol ang espesyalistang serbisyong medikal sa katawhan.
Gitutokan sa medical mission ang mga pasyenteng adunay surgical cases, lakip ang mga kaso nga may kalabotan sa atay, hepatobiliary ug pancreatic conditions, ingon man mga pasyenteng nanginahanglan og konsultasyon alang sa cancer-related cases.
Pinaagi sa maong libreng serbisyo, nakakuha ang mga pasyente og medical consultation, assessment ug saktong giya gikan sa mga medical specialist nga mitambong sa kalihokan.
Gipadayag sa mga nag-organisar nga ang programa nagtumong sa pagtabang sa mga Zanortehanon nga makadawat og kalidad nga pag-atiman sa panglawas nga dili na kinahanglan mobiyahe pa sa halayong lugar alang sa espesyalistang konsultasyon.
Apil sa paghatag sa serbisyo sila si Dr. Jonathan Navarro ug Dr. Imeldo Gamallo II, kauban ang mga medical staff ug uban pang personnel nga mitampo sa malampusong pagpatuman sa medical activity.
Gipasalamatan usab ang suporta ni Governor Darel Uy ug ZNMC Hospital Administrator Dra. Esmeralda Nadela sa pagpadayon sa mga inisyatiba nga nagtumong sa pagpaabot sa serbisyong panglawas ngadto sa mga komunidad sa lalawigan.
Ang maong medical outreach nagpadayon nga usa sa mga pamaagi aron mapalapad ang access sa mga Zanortehanon sa medical consultation ug specialist care, ilabina alang sa mga pasyenteng adunay seryoso o komplikadong kondisyon.(MEDALYN U. BORJA)
Source: Zamboanga del Norte Medical Team