Gipa-ilaila na sa City Health Office of Dipolog ang bag-ong Doctor to the Barrio (DTTB) nga moalagad sa dakbayan atol sa courtesy meeting niini sa City Mayor’s Office kagahapong adlawa, Pebrero 23, 2026.
Gipangunahan ang delegasyon ni Assistant City Health Officer Dr. Frances Anne A. Bustillo, kauban si CHO Nurse Supervisor Donnabelle V. Mutia ug DMO V Dr. Ellaine Jean J. Rodriguez sa Department of Health – Provincial Health Office. Samtang gisugat sila ni City Vice Mayor ug OIC City Mayor Senen O. Angeles.
Gipaila isip bag-ong DTTB si Dr. Jeorge Michael H. Buletic, nga ipadala sa dakbayan ubos sa Doctors to the Barrios Program sa DOH. Ang maong programa nagdeploy og mga doktor ngadto sa geographically isolated ug underserved areas aron mapalig-on ang paghatag og batakang serbisyo medikal.
Sumala sa mga opisyal, ang DTTB motrabaho isip rural health physician sulod sa tulo ka tuig, nga magtabang sa pagpaayo sa healthcare delivery ug pagpalapad sa access sa essential medical services sa komunidad.(IKEN B. GULLEM)
Source: Dipolog City Government