Nadugangan ug usa ka bag-ong ambulansya ang Liloy Integrated Health District Hospital human pormal nga giturn-over sa Department of Health (DOH) ang ambulansya, isip suporta sa mas paspas ug epektibong emerhensyang pagresponde sa amihanang bahin sa probinsya.
Gipangunahan ang turnover ni Gov. Darel Dexter T. Uy kauban si Vice Gov. Julius C. Napigquit, Board Member Venus A. Uy, ug Dr. Noel C. Herrera, Chief sa ospital. Gibendisyunan ang ambulansya ni Rev. Fr. Simplicio C. Lomarda, Jr. atol sa mubo nga seremonya.
Sumala ni Gov. Uy, ang ambulansya usa ka hinungdanong kahimanan aron masiguro ang hustong paghatod sa pasyente, ilabi na sa mga kritikal nga kahimtangan. Gibutyag niya nga padayon ang paningkamot sa probinsyal nga gobyerno sa pagpalig-on sa healthcare system ug pagdala og serbisyo nga mas duol sa katawhan.
Gipasiugda usab ni Vice Gov. Napigquit ang kahinungdanon sa koordinasyon tali sa national ug local government aron matabangan ang mga district hospital nga nag-alagad sa mga lagyong komunidad.
Ang maong donasyon nagpakita sa padayon nga panagtambayayong sa DOH ug sa Provincial Government of Zamboanga del Norte alang sa mas lig-on ug episyenteng serbisyong panglawas sa probinsya. (IKEN B. GULLEM)
Source: Zamboanga del Norte Provincial News Network