Gipahigayon sa Department of Agrarian Reform (DAR) Zamboanga del Norte ang nagkadaiyang pulong-pulong uban sa mga Agrarian Reform Beneficiaries (ARBs) sa mga lungsod sa Labason ug Gutalac isip kabahin sa ilang padayong paningkamot sa pag-atubang sa mga isyu kabahin sa yuta ug land survey.
Sa Labason, nahimong abli nga plataporma ang konsultasyon aron mapadayag sa mga ARBs ang ilang mga kabalaka may kalabotan sa utlanan sa yuta ug mga isyu sa survey. Gitumong niini ang paghatag og klarong kasayuran ug pagtul-id sa mga dili pagsinabtanay nga mitumaw sa field.
Samtang sa Gutalac, gipahigayon ang laing pulong-pulong uban sa presensya sa SPLIT Legal ug Survey Team. Nagtutok ang diskusyon sa mga bahin sa barangay roads ug uban pang public use areas nga naapektuhan sa miaging survey activities, lakip ang pagpasabot sa legal ug teknikal nga aspeto sa maong mga isyu.
Sumala sa DAR, ang maong mga konsultasyon importante aron masiguro nga husto, transparent, ug makiangayon ang pagpatuman sa land survey activities, samtang ginatagaan og tingog ang mga benepisyaryo sa agrarian reform sa mga desisyong makaapekto sa ilang yuta ug panginabuhian.(IKEN B. GULLEM)
Source: DAR ZAMBONORTE