Gibutyag ni Gobernadora Pamela Baricuatro nga padayon nga gipalapad sa Gobyerno sa Lalawigan sa Sugbo ang mga programa sa agrikultura aron mapalig-on ang suplay sa pagkaon ug makatabang sa pagpakunhod sa kakabos sa lalawigan.
Matod sa gobernador, importante nga mapalig-on ang sektor sa agrikultura aron dili na kaayo magsalig ang Cebu sa pagkaon nga gikan pa sa ubang lugar. Kon mas daghan ang maproduce sa lalawigan, mas motaas usab daw ang kita sa mga mag-uuma ug mahimong mas lig-on ang suplay sa pagkaon.
Lakip sa mga programa sa Capitol ang Agrilink, Adopt-a-Farm Program, paghatag og fish cages, pagtukod sa People’s Food Center, ug paghatag og binhi, kahayopan, ug ubang tabang panginabuhi sa mga mag-uuma ug mangingisda. Ang People’s Food Center nagtugot sa mga mag-uuma nga direktang makabaligya sa ilang produkto nga walay abang ug walay middleman.
Atol sa iyang pagbisita sa Balamban, nangulo usab si Gov. Baricuatro sa paghatag og tabang sa 20 ka mag-uuma gikan sa Barangay Nangka ug Cantuod nga naapektuhan sa Bagyong Tino. Nadawat nila ang mga kalabaw, kanding, walking tractor, mga bakuna alang sa hayop, ug uban pang veterinary medicines ug suplay.
Gipasalamatan usab sa gobernador si Public Health Consultant Dr. Nikki Catalan tungod sa pagdumala sa mga reporma sa panglawas nga, matod niya, nakahatag na og kaayohan sa mga Sugbuanon.
I via Renante Socia Lada