Bisan pa sa pagbunok sa ulan nianang kadlawon, wala matinag ang grupo ni Govenor Roberto “Berto” Uy sa pagpadayon sa paghatud sa mga ayuda alang sa mga katawhan sa isla sa Aliguay, sakop sa dakbayan sa Dapitan ning lalawigan sa Zamboanga del Norte.
Lulan sa tulo ka speed boat ug laing duha ka dagkong pumpboat nga gikargahan sa mga ayuda, mibiyahe ang grupo ngadto sa Aliguay aron paghatud sa mga nagkadaiyang ayuda nga gikinahanglan sa katawhan sa isla.
Paghidangat sa isla, gipahigayon ang usa ka programa diin didto gitunol ang napulo 15 ka horse power nga makina sa pumpboat, 250 ka sakong bugas (5kls. per sack), tulo ka solar lights, usa ka wheelchair, assorted medicines, tagurha ka mga bola sa volleyball ug basketball.
Tungod niini, wala magdahom ang mga katawhan sa Aliguay nga ingun niadto ka daghan ang ilang nadawat nga grasya gikan sa probinsya sanglit makina raman unta sa pumpboat ang ilang gitinguha alang sa ilang mga mangingisda.
Busa, dako kaayong pasalamat sa duha ka mga konsehal nga sila si Rolando Biolango ug ni Danilo Biolango nga maoy nangunay ug naghangyo sagobernador nga unta mahatagan usab ug ayuda ang ilang mga tagi barangay sa Aliguay. (Rigin Rusiana)