Gisugdan na kaniadtong Pebrero 19, sa Department of Economy, Planning, and Development (DEPDev) Central Office ang pagdawat og mga aplikasyon alang sa 2026 Presidential Filipinnovation Awards (PFA), sumala sa pahibalo isip Secretariat sa National Innovation Council (NIC).
Kimi gipadayag pinaagi sa sulat ni Maria Felicidad Guerrero, Vice Chairperson sa RDC IX ug Regional Director sa DEPDev IX, nga gipadala kang Darel Dexter Uy. Ang pagpatuman sa maong awards nagbase sa Executive Order No. 99, s. 2025 nga nag-establisar sa PFA isip tinuig nga kompetisyon sa NIC, ug sa Memorandum Circular No. 78, s. 2025 nga nagmando sa tanang ahensya sa gobyerno sa paghatag og suporta sa programa.
Tumong sa Filipinnovation Awards ang pag-ila sa mga negosyante ug indibidwal nga Filipino nga adunay mga bag-ong produkto o serbisyo nga nagpakita og inobasyon ug kahusayan.
Gidasig sa DEPDev ang mga miyembro sa Regional Development Council IX ug mga sectoral committees sa pagtabang sa pagpalapad sa impormasyon bahin sa awards pinaagi sa paghimo og promotional videos, reels, ug art cards aron mas daghang aplikante ang maengganyo.
Mipadayag usab si Governor Uy sa iyang suporta sa inisyatibo, nga nagtan-aw niini isip higayon sa pagdasig sa lokal nga inobasyon ug pagpalambo sa ekonomiya sa rehiyon.(IKEN B. GULLEM)
Source: Zamboanga del Norte Provincial News Network