Gisuportahan karon sa tibuok pwersa sa kapolisan dinhi sa Zamboanga del Norte ang apila ni Kalihim Benjamin Abalos sa Department of the Interior and Local Government (DILG) kalabot na sa courtesy resignation sa mga high-ranking PNP officers.
Kini ang gipamahayag ni Provincial Director PCol. Glenn Dulawan sa Zamboanga del Norte Police Provincial Office (ZNPPO) sa pagpakighinabi kaniya human sa ilang New Year’s Call ngadto ni Governor Rosalina “”Nanay Nene” Jalosjos, Enero 6, niining tuiga.
Dugang ni PCol. Dulawan nga dili sila magmakuli sa pagsuporta sa apila ni Kalihim Abalos kalabot na sa pagbuntog sa illegal drugs sanglit siya mismo sugod pa sa tuig 1999, anaa na siya nagtrabaho batok sa ginadiling druga, busa nakita niya ang problema kalabot niini.
Si PCol. Dulawan nagkanayon nga buot limpyohon ni Kalihim Abalos ang mga general ug colonel sa alegasyon nga sila nahilambigit sa ginadiling druga.
Apan gipasabot sa maong provincial director nga ang maong courtesy resignation ang wala kini nagpasabot nga wagtangon gilayon sa talaan isip miyembro sa kapolisan apan ipaagi pa usab kini ug makuting imbestigasyon hangtud nga mapamatud-an sa appointing authority nga nahilambigit ka sa maong illegal nga binuhatan.
Si PCol. Dulawan ang mapasigarbuhong mipahibalo nga ang kapolisan sa Zamboanga del Norte pabiling anaa sa high morale sanglit walay nahilambigit sa ginadiling druga.
Apan sa taho nga adunay mga polis ang migamit sa ginadiling druga, padayon nila kining gi-monitor aron mahatagan sa tukmang aksiyon.
(Source: Provincial Information Center Zanorte Facebook page)
