Pipila sa mga biktima sa Bagyong “Kristine” ning dakbayan sa Dipolog anh nakadawat sa gitanyag nga ayuda ilawom sa “Assistance to Individuals in Crisis Situation“(AICS) program gikan sa kagamhanang lokal ning dakbayan niadtong Oktubre 28 ug 29 ning tuig.
Ang maong pag apod-apod sa ayuda pinangunahan sa Bise Mayor ning dakbayan sa Dipolog nga si Vice Mayor Senen O. Angeles, isip representante ni City Mayor Darel Dexter T. Uy , didto sa buhatan sa Mayor.
Duha ka mga benepisyaryo ang nakadawat sa maong tabang niadtong Oktubre 28,2024 nga residente ning syudad ,kansang mga panimalay ang gikataho nga natumbahan sa dagkong kahoy nga maoy hinungdan sa pagkadaut niini atol sa “Bagyong Kristine” nga nasinati ning dakbayan.
Laing duha usab ka mga biktima ang nakadawat sa samang ayuda niadtong Oktubre 29, 2024, isip tabang ngadto sa kabanay sa usa ka residente kinsa gikataho nga namatay dihang natumbahan sa dakong puno-an sa Mangga,Ug laing usa ka biktima usab kinsa gikataho nga ang balay niini, sa kusinang bahin ang natumbahan usab sa dakong puno-an sa kahoy, hinungdan sa pagka-guba niini tungod kadaot nga dala sa di maayong panahon.
Tungod niini ang maong mga indibidwal kinsa nakadawat sa maong hinabang gikan sa kagamhanang lokal ning dakbyan,nagpasalamat ngadto sa mga nagpaluyo niini nga mga opisyal gikan sa buhatan sa Mayor ug bise mayor nga maoy nagdumala sa paghataga ug hinabang kanila nga nanginahalan.(Medalyn U. Borja)
Source: Dipolog City Government