Opisyal nga gi-turn over ang A+ Dorm for Subanen Learners sa Paranglumba, Siayan, ngadto sa komunidad aron magsilbing kapuy-anan sa mga batang Subanen nga nag-eskwela ug naggikan sa mga hilit nga lugar.
Nahimo ang maong dormitoryo pinaagi sa suporta sa DigiPlus Foundation ug Rafael Jaseper Vicencio, uban sa pakigtambayayong sa lokal nga pangagamhanan sa Siayan, Tribal Council of Elders, ug sa komunidad sa Subanen.
Ang pag-turn over sa A+ Dorm nagtimaan sa pagkompleto sa usa ka pasilidad nga gitumong sa pagtabang sa mga Subanen learners nga nag-atubang og kalisod tungod sa kalay-on sa ilang mga puy-anan gikan sa eskwelahan.
Pinaagi sa dormitoryo, ang mga estudyante makapuyo sa mas duol nga lugar sa ilang eskwelahan, diin sila makapahulay ug makatuon nga mas luwas ug mas komportable. Maminusan usab niini ang kakapoy ug panahon nga ilang gigahin sa adlaw-adlaw nga pagbiyahe gikan sa ilang mga komunidad.
Mitambong sa turnover ceremony ang Regional Director sa National Commission on Indigenous Peoples (NCIP) Region IX, nga mipahayag sa iyang suporta sa mga inisyatibo alang sa Subanen Tribe of Siayan.
Gihatagan usab og pag-ila sa FSMMI ang mga indibidwal ug grupo nga mitampo sa pagkahimo sa proyekto, lakip si Angela Camins-Weineke, Executive Director sa DigiPlus Foundation, ang foundation team, mga volunteers, Y4C youth, social work interns gikan sa Saint Joseph College of Sindangan Inc., ug ang komunidad sa Paranglumba.
Sumala ni Rey L. Anugon, presidente sa FSMMI, ang A+ Dorm maghatag og mas dakong oportunidad sa mga batang Subanen nga makapadayon sa ilang pagtuon bisan pa sa mga hagit sa pinansyal nga kahimtang ug kalay-on.
Gipahayag usab ni Timuay Labi Johnny C. Anugon Sr., Municipal Indigenous Peoples Mandatory Representative ug Tribal Chieftain sa Subanen Tribe of Siayan, nga ang dormitoryo makatabang sa mga kabataan sa pagpadayon sa ilang edukasyon samtang nagpabilin nga konektado sa ilang kultura ug identidad.
Alang kang Rev. Fr. Dean Klayford V. Bongat, founder sa FSMMI, ang pag-turn over sa dormitoryo usa ka konkretong tubag sa panginahanglan sa Indigenous children nga adunay limitadong access sa edukasyon tungod sa kalay-on ug kakulang sa kahinguhaan.
Samtang, gilauman sa DigiPlus Foundation nga ang A+ Dorm mahimong labaw pa sa usa ka kapuy-anan, kundili usa ka luwas nga lugar diin ang mga Subanen learners makapahulay, makatuon ug makadamgo alang sa ilang kaugmaon.
Ang turnover sa A+ Dorm nagpakita sa hiniusang paningkamot sa mga Indigenous leaders, komunidad, lokal nga pangagamhanan, non-profit organizations, donors ug volunteers sa paghatag og mas maayong kahigayonan sa edukasyon alang sa sunod nga henerasyon sa mga Subanen learners.(IKEN B. GULLEM)
Source: Zamboanga del Norte Provincial News Network