Patay ang usa ka lalaki human gipusil sa makadaghang higayon sa Barangay S. Arabi, Siocon, Zamboanga del Norte, alas-7:45 sa buntag niadtong Septiyembre 9, 2026.
Giila sa kapulisan ang biktima nga si Cresencio Dela Peña Patcho, legal age ug residente sa Sitio Lagpan, Barangay Poblacion, Siocon.
Base sa inisyal nga imbestigasyon sa Siocon Municipal Police Station (MPS), naglakaw ang biktima gikan sa Barangay Bucana padulong sa Barangay Poblacion. Sa iyang pag-abot sa Barangay S. Arabi, giingong gipusil siya sa makadaghang higayon sa suspek nga giila sa kapulisan sa ngalan nga Abraham.
Human sa pagpamusil, mikalagiw dayon ang suspek sakay sa motorsiklo padulong sa direksyon sa Barangay Bucana. Gidala ang biktima ngadto sa ospital apan gideklarang Dead on Arrival (DOA) sa attending physician nga si Dra. Judith S. Nillaga.
Narekober sa crime scene ang upat ka basyo sa bala nga caliber .45 nga giingong gigamit sa pagpamusil.
Samtang, base sa inisyal nga impormasyon nga nakuha sa imbestigasyon, gitan-aw sa kapulisan ang personal nga panagbangi o pagdumot isip usa sa posibleng motibo sa krimen.
Padayon pa usab ang imbestigasyon aron matino ang tinuod nga motibo ug ang eksaktong kahimtang nga mitultol sa insidente.
Samtang, nagpadayon ang pursuit operation sa mga personnel sa Siocon MPS aron masuta ang nahimutangan ug madakop ang suspetsadong mipusil sa biktima.(IKEN B. GULLEM)
Source: RoNey Pacilan Tv