Gisugdan kagahapong adlawa, Disyembre 2, 2025 ang ilang unang adlaw sa immersion program sa 95 ka Grade 12 nga estudyante gikan sa Liloy National High School (LNHS) sa Zamboanga del Norte 2nd Provincial Mobile Force Company (ZN 2nd PMFC).
Gipangunahan ang pormal nga turnover sa mga estudyante ni Assistant School Principal II Eva Joy Manga, nga mirepresentar kang Naida S. Mercado, School Principal II. Gidawat kini sa hepe sa yunit nga si PMAJ Bill Fernando P. Jumalon, OIC, nga opisyal usab nga mipahibalo sa pagsugod sa immersion ug midayeg sa partisipasyon sa mga estudyante.
Human sa seremonya, gilambigit dayon ang mga immersants sa unang mga kalihokan nga naglakip sa basic drills ug ceremonies. Dinhi nakasinati sila sa disiplina, pagsinabtanay sa lihok, ug husto nga pormasyon, usa ka praktikal nga pagsugod sa ilang tinuod nga kahibalo sa operasyon sa kapulisan.
Nagpabiling malampuson ug makahuluganon ang unang adlaw sa immersion program, nga nagtakda sa mas lawom pang kasinatian sa mosunod nga mga adlaw.(IKEN B. GULLEM)
Source: Zamboanga del Norte 2nd PMFC