Daghang asosasyon sa mag-uuma gikan sa Zamboanga del Norte ang miapil sa 4th Provincial Organic Agriculture Congress nga gipahigayon sa Plenary Hall, ZN Convention and Exhibition Center, kaniadtong Disyembre 2, 2025..
Ang kalihokan, nga may tema “Kabuhayang OA, Kinabukasang OK: Halina at Kumita sa Organikong Agrikultura,” gipasiugdahan sa Provincial Government pinaagi sa Office of the Provincial Agriculturist (OPAg) ubos ni Acting Provincial Agriculturist Armie Bergado. Gitambongan kini sa mga representante sa DA-RFO IX, ATI-RTC IX, SAC–Diocese of Dipolog, ug mga lokal nga opisyal.
Gipakita sa mga asosasyon ang ilang organikong produkto sama sa utanon, prutas, Roselle juice ug tea, pure honey, ug tableya. Samtang, gisugdan ang programa pinaagi sa Salad Making Contest ug ribbon-cutting.
Gipadayag ni OAP Focal Person Janice Legaspi nga Zamboanga del Norte mao ang unang probinsya sa Region 9 nga nakapahigayon ug Provincial Organic Congress. Duha ra ka probinsya sa rehiyon ang aktibo sa organic program—Zamboanga del Norte ug Zamboanga del Sur.
Si Board Member Kaye Marie Bolando mipahibalo nga naglibot sila sa Sibuco uban sa TESDA aron manghatag ug tool kits sa mga graduate sa Organic Farming NC II, nga makatabang sa paghimo ug organikong abono. Gidasig usab niya ang mga mag-uuma nga ipadayon ang organikong pagpanguma aron motaas ang kita.
Samtang, lima ka asosasyon ang nakadawat ug certificate of accreditation gikan sa Organic Certifying Body, nga nagtugot kanila sa pagbutang ug “Organic” sa ilang mga produkto. Sumala ni Bergado, kini nga mga grupo mahimong mo-assess sa ubang asosasyon nga mosunod sa organikong pamaagi sa pagpanguma.(IKEN B. GULLEM)
Source: Zamboanga del Norte Provincial News Network