DAPITAN CITY — Gisugdan na ang paghatag og pinansyal nga suporta sa mga pamilyang apektado sa tukoran sa bag-ong merkado, diin siyam ka panimalay ang unang nakadawat og tag-₱20,000 nga ayuda niadtong Pebrero 26 sa Barangay Linabo.
Kabahin kini sa 31 ka pamilya nga kinahanglan mobiya sa maong lugar aron mahatagan og luna ang konstruksyon. Ang pag-release sa pondo giisip nga inisyal nga lakang sa relokasyon, samtang ginapahimutang ang proseso sa pagpabalhin ug pag-demolish sa mga istrukturang natandog sa proyekto.
Nagtinabangay ang Office of the Building Official ug City Social Welfare and Development Office sa pag-validate ug pagproseso sa mga benepisyaryo aron masiguro nga hapsay ug transparent ang pagpatuman sa assistance.
Sumala sa lokal nga panggamhanan ubos sa administrasyon ni Mayor Belen Uy, ang proyekto sa bag-ong merkado gitumong nga maghatag og mas maayong pasilidad sa pamaligya ug mas organisadong sentro sa negosyo alang sa mga Dapitanon.(JENIFFER JR. DELICA)
Source: City Government of Dapitan