Nihatag ug 9.4 million pesos nga cash assistance ang buhatan sa Department of Social Welfare and Development Office (DSWD), kini alang sa City Government sa Dapitan.
Ang maong tabang resulta sa walay kakapoy nga pagpaningkamot sa Mayor sa dakbayan sa Dapitan nga si Mayor Jalosjos sa iyang representasyon ngadto sa lain-laing mga nasudnong ahensya sa pagpangita og mga paagi sa pagpasiugda ug pagsuporta sa Sustainable Livelihood Program nga gituyo alang sa mga takos nga makadawat og accredited nga organisasyon sa Dapitan City.
Giisip kini nga maayong balita nga gidala sa mga opisyal sa DSWD atol sa ilang pagbisita niadtong miaging semana dihang ni-courtesy call sila kang Mayor Jalosjos.
Ang City Social Welfare and Development Office maoy nangulo sa Technical Working Group (TWG) nga nag tahas sa pag-ila sa mga livelihood program sa matag barangay lakip na ang recipient association/organisasyon nga motutok sa ilang gisugyot nga tagsa-tagsa ka livelihood program.
Ang target nga 18 ka accredited associations/organizations sa Dapitan City makadawat ug P600,000 isip cash assistance alang sa ilang malahutayong livelihood program.
Sa kinatibuk-an, adunay 18 ka mga asosasyon nga organisahon aron sa pagpalambo sa usa ka livelihood plan ug matod pa nga ang maong mga asosasyon nga husto sa pag assess sa TWG hatagan ug P600,000.00 isip kapital alang sa ilang giaprobahan nga malungtarong programa sa panginabuhian.
(Source: City Government of Dapitan)
