Sa tinguha ni Governor Rosalina “Nene” Jalosjos nga mapadali ang pagpatuman sa nagkalain-laing proyekto sa tibuok lalawigan sa Zamboanga del Norte, 8 ka mga dagkong bag-ong motorsiklo ang gipalit sa Kagamhanang-Probinsyal pinaagi sa Provincial General Services Office nga gipanguluhan ni Mr. Joseph Alvie Agolong alang sa Provincial Engineering Office, (PEO).
Ang 8 ka Brand New Honda Motorcycle CRF 150 CC pormal nga giturn-over ni Provincial Administrator Mr. Wilberth “Jojo” Magallanes ngadto sa Area Engineers sa 8 ka satellite PEO Offices ning lalawigan, kauban ni Mr. Agolong ug PEO Provincial Engineer Engr. Rey Eguia sa usa ka simple Turn-Over Ceremony nga gipahigayon sa atubangan sa kapitolyo.
Matod pa ni PA Magallanes, ang nasangpit nga mga motorsiklo gamiton sa PEO pinaagi sa iyang mga satellite office aron monitor ang implementasyon sa mga proyektong gipatuman sa Kagamhanang-Probinsyal pinaagi sa PEO sa nagkalain-laing bahin ning lalawigan, ilabina sa mga lugar nga dili maabot sa 4-wheeled vehicles.
Dugang pa ni Mr. Magallanes nga laing 15 ka mga 4X4 pick-up na usab ang paliton sa Kagamhanang-Probinsyal alang sa PEO.
Mahinumdoman nga gilimasan sa nakalabayng administrasyon ang PEO sa mga heavy equipment ug gidonar sa mga munisipyo, nga kaalyado sa kanhing administrasyon ni Berto Uy.
Matod pa ni PA Magallanes, apike man ang panudlanan sa lalawigan, apan gipaningkamutan ni Gov. Jalosjos nga mapalit ang dugang mga ekwipo aron mapatuman ang mga nagkalain-laing mga proyekto ilabi na kadtong mga munisipyo nga nahikawan niini sa nakalabayng administrasyon.
Giklaro ni Mr. Magallanes, nga ilalom sa administrasyon ni Gov. Jalosjos ang tanan ZaNortehanon makaangkon sa mga proyektong alang kanila.
Pinaagi niini, matod pa niya, nga makaamgo ang mga ZaNortehanon sa kalainan ug kamatinud-anon sa administrasyong Jalosjos, subay sa panultihon sa gobernador nga “Misyon ko, Tinuod nga Serbisyo.” (PIC-ATRuda, photo courtesy by Jeffrey Lacay)
(Source: Provincial Government of Zamboanga del Norte Facebook page)