Kapin sa tres milyon ka pesos ang kantidad sa ayuda nga gipagawas sa Provincial Social Welfare and Development Office (PSWDO) pinaagi sa Assistance to Individuals in Crisis Situation (AICS) program sa bulan sa Pebrero ug Marso ning tuiga.
Sumala ni Acting PSWD Officer Hannah Lou Mandantes, miabot sa 661 ka mga indibidwal sa probinsya ang nakadawat sa lain-laing tabang sama sa medical assistance, burial assistance, ug shelter assistance sulod sa duha ka bulan.
Gipadayag sa PSWDO nga ang AICS program gitumong sa pagtabang sa mga indibidwal nga nakasinati og krisis ug nagkinahanglan og agarang suporta gikan sa kagamhanan.
Sa miaging tuig usab, gikan sa bulan sa Setyembre hangtod Disyembre, kapin sa lima ka milyon ka pesos ang na-release nga ayuda nga nakabenepisyo sa 1,120 ka mga indibidwal sa probinsya.
Gipasiugda sa buhatan nga padayon nilang ipatuman ang AICS isip usa sa mga programa nga naghatag og suporta sa mga pamilyang nanginahanglan sa panahon sa emerhensya.(IKEN B. GULLEM)
Source: Zamboanga del Norte Provincial News Network