Giduso ni Ian Amatong ang House Bill No. 7452 nga karon giusisa sa House of Representatives of the Philippines, nga nagtumong sa pagtukod sa National Recovery and Acceleration Program (NRAP) aron matubag ang kapobrehon ug mapalambo ang kahimtang sa ekonomiya sa mga kabus nga probinsya sa nasud.
Sa committee hearing, gipasiugda ni Cong. Amatong ang panginahanglan sa usa ka lig-on ug koordinadong pamaagi sa gobyerno aron masulbad ang dugay nang mga hagit sa kakabus, ilabi na sa mga komunidad nga kulang og access sa batakang serbisyo ug oportunidad sa panginabuhian.
Ilalom sa HB 7452, gilaraw ang NRAP isip usa ka komprehensibong programa nga maghiusa sa nagkalain-laing ahensya sa gobyerno aron mapaspasan ang paghatag og serbisyo sa edukasyon, imprastraktura, ug job opportunities, isip kabahin sa long-term nga plano sa pagpauswag sa ekonomiya sa mga probinsya.
Gipahigayon ang hearing uban ang partisipasyon ni Gloria Macapagal-Arroyo ug mga representante sa nasudnong ahensya nga mipadayag og suporta ug teknikal nga suhestiyon. Samtang, padayon ang deliberasyon aron masiguro nga ang HB 7452 mahimong epektibong instrumento sa inclusive growth ug patas nga kauswagan sa tibuok nasud.(IKEN B. GULLEM)
Source: Zamboanga del Norte Provincial News Network