Usa ka bag-ong oportunidad alang sa mga mangingisda sa Sindangan ang naablihan human madawat sa Goleo Fisherfolk’s Association ang 62-footer nga Fiberglass Reinforced Plastic (FRP) Tuna Handline Fishing Boat atol sa blessing ug ceremonial turnover nga gipahigayon sa IPPA Port sa Barangay Calatunan.
Gipakita sa maong turnover ang padayon nga suporta sa gobyerno sa sektor sa pangisdaan pinaagi sa paghatag og modernong kagamitan nga makatabang sa pagpalambo sa produksyon ug kita sa mga mangingisda. Gitambongan kini sa mga opisyal sa BFAR, probinsyal ug lokal nga panggamhanan, uban sa mga representante sa nagkadaiyang sektor.
Sumala sa mga opisyal, ang proyekto dili lamang usa ka paghatag og sakayan kondili usa usab ka lakang aron mapalig-on ang kapasidad sa mga organisadong mangingisda ug mapauswag ang ekonomiya sa komunidad.
Gilauman nga ang bag-ong tuna fishing boat mahimong instrumento sa mas produktibong pangisda ug dugang kalamboan sa industriya sa pangisdaan sa Sindangan.(IKEN B. GULLEM)
Source: Irene Ate Ai Labadlabad