Dako nga hagit sa panginabuhian sa mga mananagat ang gitubag sa gobyerno human opisyal nga gitunol ang usa ka 62-footer “high-tech” tuna handline fishing boat ngadto sa Dipolog-Dapitan Ring Net Owners and Operators’ Association (DDROOA) niadtong Abril 9 sa breakwater sa Barangay Central.
Ang proyekto, nga gipangulohan sa Bureau of Fisheries and Aquatic Resources (BFAR) ug Provincial Government of Zamboanga del Norte (PGZN), gitumong sa pagpalig-on sa kapasidad sa mga lokal nga mananagat aron makapangisda bisan sa halayong kadagatan. Ang fiberglass-reinforced plastic (FRP) nga sakayan adunay modernong pasilidad sama sa cabin ug comfort room alang sa mas luwas ug komportable nga biyahe.
Gipasiugda ni Gobernador Darel Dexter T. Uy ang panginahanglan sa padayon nga suporta sa sektor sa pangisda, nga giila isip usa sa nag-unang haligi sa ekonomiya sa probinsya nga adunay kapin sa 400 kilometro nga baybayon. Samtang, ang mga representante sa Kongreso mipasalig sa dugang nga pondo ug mga polisiya aron mapalambo ang industriya ug maprotektahan ang panginabuhian sa mga mangingisda.
Sumala sa BFAR, lakip sa programa ang pagbansay sa mga benepisyaryo sa hustong fish handling, post-harvest practices, ug teknikal nga operasyon sa sakayan aron masiguro ang dugayng paggamit niini. Gilauman nga pinaagi sa maong inisyatiba, motaas ang produksyon sa isda ug kita sa mga mananagat sa Dipolog ug Dapitan.(IKEN B. GULLEM)
Source: Zamboanga del Norte Provincial News Network