Napalig-on ang kapasidad sa unom (6) ka Irrigators Associations (IAs) sa Zamboanga del Norte human misalmot sa tulo ka adlaw nga pagbansay sa operasyon ug pagmintinar kabahin sa Composting Facility for Biodegradable Waste (CFBW) nga gipahigayon sa Department of Agriculture–Bureau of Soils and Water Management (DA-BSWM) gikan Nobyembre 18–20, 2025 sa Top Plaza Hotel, Dipolog City.
Ang kalihukan gimugna pinaagi sa pakigtambayayong sa National Irrigation Administration–Zamboanga del Norte Regional Sub-Office (NIA ZDNRSO) uban sa suporta sa NIA Regional Irrigation Office IX (NIA RIO IX), aron mapalambo ang limpyo ug sustenableng pag-uma pinaagi sa husto nga pagdumala sa biodegradable waste.
Lakip sa mitambong nga mga IA beneficiaries mao ang Dipolog-Polanco IA (Dipolog City), Batayan-United Farmers IA (Kalawit), Silalela IA (Polanco), Don Federico IA (Sindangan), Upper-Lower Irasan IA (Roxas), ug Dansalan Makugihon IA (Labason). Gitudloan ang mga partisipante sa hustong paggamit sa kagamitan, pagmintinar, proseso sa paghimo og compost, troubleshooting, ug safety protocols.
Gipalawom usab sa diskusyon ang papel sa locally produced organic fertilizer sa pagpaayo sa abot, pagpreserbar sa yuta, pagkunhod sa gasto sa komersyal nga abono, ug pagpalig-on sa resiliency sa mga mag-uuma ilabi na sa nag-usab-usab nga klima.
Gipasalamatan sa NIA ZDNRSO ang DA-BSWM ug NIA RIO IX sa padayon nga suporta sa pagpauswag sa kahibalo ug abilidad sa mga irrigator sa probinsya. Gilauman sa ahensya nga ang maong training makamugna og dugayng kaayuhan sa yuta, mas lig-on nga produksyon sa tanom, ug mas aktibong partisipasyon sa komunidad sa pag-atiman sa kinaiyahan—usa ka lakang padulong sa mas luwas ug malungtarong sektor sa agrikultura sa Zamboanga del Norte.(IKEN B. GULLEM)
Source: NIA Zamboanga Peninsula