Dakpan sa mga personahe nga miyemro sa City Drug Enforcement Team (CDET) sa Dapitan City Police Station usa ka 54 anyos nga Lalaking Dapitanon, pinaagi sa gipahigayon nga Joint Buy-Bust operation, nga gipahigayon ditdto sa Sitio Lawa-an, sa Brgy Banonong, sa Dapitan City, ning Probinsiya sa Zamboanga del Norte, niadtong nakalabay’ng adlaw, Agusto 18, 2025, sa may alas 5:29 sa hapon.
Giila sa Dapitan Pnp ang nasangpit nga dinakpan sa alyas nga Jimmy, minyo nga usa ka Motorcab Driver ug Lumolupyo sa Purok Uno, sa Brgy Potol, Dapitan City, ning mao ra usab nga Probinsiya, diin matud pa sa pahayag nga giluwatan sa mga kapulisan sa maong dakbayan, nga nasikop nila ang nahisgutang Suspect, pinaagi sa gipahigayon nga Joint Buy-Bust operation, ug didto posetibo nilang nakuhaan og 4 ka gamay’ng naka Heat-Sealed Transparent Plastic Sachet’s, nga adunay sulod nga White Crystalline Granules, ug kini gituohang Shabu, samtang gibana-bana ang gibug-aton niining mokabat ngadto sa 2 ka gramos, maingon man, gibana-bana usab ang kantidad niini base sa Standard Street Value niining, mokabat sa Php13,600.00.
Nakuha usab pagbalik gikan sa kontrol ug posisyon sa dinakpan ang usa ka tibuok nga Php500.00 nga maoy gigamit isip Buy-Bust money sa maong operasyon, maingon man ang uban pang mga personal nga gamit niining, gilangkuban sa pipila ka mga drug paraphernalia, kolor itum nga mobile phone nga adunay Sim Card, ug ang Driver’s License sa nahisgutang Suspetsado.
Sa pagka karon ang naasoy nga dinakpan, atua na ubos sa kustodiya sa Dapitan City Custodial Facility, alang na sa tukmang disposasyon, samtang gihikay pa ang pagpasaka og kaso sa korte, tungod sa iyang nabuhat nga pagsupak sa Republic Act 9165 (Comprehensive Dangerous Drug Act of 2002).(Julius Esmade)