Gitapos sa lokal nga pangagamhanan sa Sindangan ang tuig 2025 pinaagi sa programang Pamasakong Handog sa Sindangan, diin ang tanang 52 ka barangay sa lungsod nakabenepisyo.
Ubos sa aktibo ug matinud-anong liderato ni Hon. Mayor Glona G. Labadlabad, kapin 28,000 ka panimalay ang nakadawat og 10 kilo nga bugas ug mga delata, isip tabang ug pagpaambit sa panalangin atol sa Kapaskohan.
Sumala sa LGU, ang programa tumong nga masiguro nga walay pamilya ang mahibilin, labi na sa panahon sa pista nga kasagaran mosaka ang gasto sa panimalay. Ang Pamaskong Handog usa ka pahayag sa pag-atiman sa katawhan ug paghatag og paglaum, ilabi na sa mga pamilyang nanginahanglan.
Gipahigayon ang maong kalihokan pinaagi sa hapsay nga koordinasyon tali sa LGU, barangay officials, ug mga boluntaryo aron masiguro ang malinawon ug patas nga distribusyon sa ayuda.
Matod pa, padayon ang LGU sa paghatag og mga programang motubag sa panginahanglan sa katawhan, dili lang sa panahon sa Kapaskohan kundili sa tanang panahon.
Ang Pamaskong Handog sa Sindangan usa ka ehemplo sa lokal nga pangagamhanan nga nagpaluyo sa kaayohan sa komunidad, nga naghatag og suporta ug paglaum samtang gisaulog ang tinuod nga kahulugan sa Pasko—ang pagpaambit ug paghigugma sa isigkatawo.(IKEN B. GULLEM)
Source: Local Government of Sindangan