Nadakpan sa kapulisan ang usa ka 51 anyos nga lalaki atol sa joint manhunt operation nga gihimo Dapitan City Police Station didto sa Brgy. Minaog, Dipolog City, Zamboanga del Norte.
Gipangulohan sa Dapitan CPS ang operasyon uban sa mga personnel sa 5th SOU Mabuhay SBC, 901st MC, RMFB9 ug 1st MC, ZNPMFC.
Ang suspek, residente sa Brgy. Owaon, Dapitan City, ug nadakpan base sa warrant of arrest nga giisyu sa Regional Trial Court, Branch 9, Dipolog City, Ninth Judicial Region, tungod sa paglapas sa Seksyon 12, Artikulo II sa Republic Act 9165 o Comprehensive Dangerous Drugs Act of 2002. Samtang, gitakdang piyansa sa korte ang kantidad nga Php 40,000.00.
Nanawagan ang Dapitan City Police Station sa publiko nga magpabiling alerto ug dayong ireport sa awtoridad ang bisan unsang kahina-hinalang kalihokan nga may kalabotan sa iligal nga droga.(IKEN B. GULLEM)
Source: DAPITAN CITY POLICE STATION