Pormal nang gibuksan sa Local Government Unit sa Roxas ang pagselebrar sa Government Employees ug Civil Society Organizations (CSO) Week, apil ang Sports Fest ug Christmas Deco-Lighting, atol sa seremonya nga gipahigayon sa Roxas Municipal Gymnasium, kaniadtong Disyembre 1, 2025.
Nagsugod ang kalihokan pinaagi sa usa ka parada nga nagpakita sa panaghiusa sa mga empleyado sa lokal nga pangagamhanan, mga sektor sa CSO, ug uban pang partisipante. Gisundan kini sa pormal nga programa nga nagdala sa temang: “Ang Maalagarong Panerbisyo, Panagdait ug Panaghiusa, uban sa Katilingbanong Tumong nga Giniyahan sa Kahitas-an, maoy Yawe sa Malungtarong Paglambo.”
Si Vice Mayor Rolando Yebes Jr. maoy mituboy sa pagsugod sa programa, samtang si Executive Assistant IV/Provincial Information Officer Rosemarie P. Miranda mipahat sa mensahe ni Gobernador Darel Dexter T. Uy. Gipasiugdahan niini ang pagpatuman sa One Stop Assistance Center (OSAC) ubos sa Executive Order No. 2 aron mapasayon ang pagkuha sa medical, educational, livelihood, social, ug legal services sa lalawigan. Si Mayor Ismael A. Rengquijo Jr. mipadayag usab sa iyang panawagan sa mas lig-on nga kolaborasyon tali sa lokal nga pangagamhanan, mga ahensya, ug tanang sektor aron masuportahan ang malungtarong paglambo sa lungsod.
Usa sa mga highlight sa nilabayng gabii mao ang Awarding Ceremony alang sa mga retirees, outstanding departments/offices, national agencies, ug CSO/Multi-Sectoral Associations and Industries nga nakaambag ug dako sa pagserbisyo publiko. Gipangulohan ni Mayor Rengquijo ang pormal nga deklarasyon sa weeklong activities, nga nagtimaan sa opisyal nga pagsugod sa sunod-sunod nga kalihokan sa selebrasyon.
Gisundan kini sa Switch-On Ceremony sa Christmas Deco-Lighting sa plaza ug municipal grounds, nga mipabaga sa kahayag sa sentro sa lungsod, ug usa ka Fireworks Display nga nakahatag ug kalingawan sa katawhan. Natapos ang unang adlaw sa kasadya pinaagi sa Disco ug Live Band Competition, nga mibati ug dugang kinabuhi sa gabii para sa mga lumulupyo ug bisita.(IKEN B. GULLEM)
Source: Zamboanga del Norte Provincial News Network