Gipabalik sa trabaho ni Governor Darel Dexter Uy ang 49 ka kanhi empleyado sa Provincial Government nga unang gitawag ug “Midnight Appointees.”
Ang maong mga empleyado mobalik sa ilang serbisyo sa Oktubre 20, 2025, human mapirmahan ang ilang mga appointment papers sa gobernador.
Kining mga trabahante nga nahimong regular sa ulahing bahin sa administrasyon ni former Gov. Roberto Uy unang gipahunong sa serbisyo tungod sa teknikal nga mga isyu. Apan pinaagi sa paningkamot sa kasamtangang administrasyon, napangitaan kini ug legal nga paagi aron sila makabalik sa ilang mga pwesto.
Gipasabot usab sa gobernador nga walay lugar sa Provincial Government alang sa mga magpabadlong o magbinuang sa trabaho.
”Ang sayop, sayop gyud — walay palakasan” matud pa ni Gov. Uy, nga misaad usab sa paghatag og reward system alang sa mga magtinarong nga empleyado.
Human sa seremonya, malipayong nadawat sa mga empleyado ang ilang mga appointment, uban sa pagpasalamat kang Gov. Uy nga ilang giisip nga ”answered prayer” human sa daghang tuig nga paghulat.(Iken B. Gullem)
photo courtesy: Zamboanga del Norte Provincial News Network