Himas Rehas sa Prisohan ang usa ka 47 anyos nga Lalaking nagkupot og dili Lisensiyadong Armas, atol sa gipahigayon nga Oplan Sita, sa mga Personahe sa Kapulisan sa Jose Dalman Municipal Police Station (JMPS), didto atubangan sa Merkado Publiko sa nasangpit nga Lungsod, ning Probinsiya sa Zamboanga Del Norte, niadtong nakalabay’ng adlaw, Setyembre 11, 2025 sa may alas 2:00 ang takna sa kaadlawon.
Base sa pahayag nga giluwatan nga pahayag sa Jose Dalman Pnp, atol sa ilang gipahigayon nga operasyon, ilang naaktuhan ang nasangpit nga Suspetsado nga naglingkod sa usa ka Motorcab nga nagparking, atubangan sa naasoy nga Merkado Publiko, diin kini giila sa alyas nga Butyok, 47 anyos, minyo ug walay trabaho, nga Lumolupyo sa Sitio Diwait, Barangay Siparok, Jose Dalman, ning Probinsiya sa Zamboanga del Norte, diin ilang nabantayan nga anaa kini ubos sa emplowensiya sa ilimnong makahubog, samtang ila usab nga nabantayan, nga adunay Pistula nga nakasuksok sa tuong bahin sa hawak niini.
Dugang pa nga pahayag sa nahisgutang Pnp Personel, nga isip awtoridad, nagpaila una siya niini, nga usa siya ka Police, ug gipangutana ang maong Suspetsado, kon aduna ba siya’y Lisensiya sa Armas nga iyang gidala-dala, apan nagmakuli ang maong Suspect, ug wala kini’y gikapakita nga Dokumento sa maong Pusil, diin nagmakuli pa kining mokooperar kanila, maong ila dayon kining gisikop.
Sa pagka karon ang nasangpit nga dinakpan atua na ubos sa kustodiya sa Jose Dalman Municipal Police Station, alang na sa tukmang disposisyon, samtang gihikay pa ang pagpasaka og kaso ngadto sa korte, sa kasong pag-supak sa Republic Act 10591 ( Comprehensive Firearm’s and Ammunition Regulations Act).(Julius Esmade)
Source: ZNPPO
