Usa ka mahinungdanong kalihokan ang gihimo alang sa mga mangingisda sa Barangay Barra ug Central Barangay, diin 450 ka indibidwal ang nakadawat og ayuda pinaagi sa mga food packs gikan sa opisina ni Senador Bong Go. Ang distribusyon gipasiugdahan ni Mr. Jade Jamolod, representante sa senador, ug gipahigayon sa Food Hub Boulevard sa may alas 11:00 sa buntag sa Agosto 28, 2025.
Ang programa nagtumong sa pagtabang sa mga sektor sa komunidad nga labing apektado sa kalisod sa panginabuhi, ilabi na ang mga mangingisda nga kasagaran nagsalig sa adlaw-adlaw nga pangisda aron masuportahan ang ilang pamilya. Gilauman nga pinaagi sa mga food packs, makadawat sila og temporaryo nga suporta ug mas mapadali ang ilang adlaw-adlaw nga paningkamot.
Ang mga food packs naglangkob sa bugas, kape, de lata, ug noodles, mga produkto nga magamit sa pamilya sulod sa pipila ka adlaw. Dugang pa, naghatag usab ang opisina og bitamina ug bola para sa mga bata.
Mipasabot si Mr. Jamolod nga ang programa kabahin sa padayong serbisyo publiko ni Senador Bong Go, nga naghatag og prayoridad sa mga marginalized sectors sama sa mangingisda, mag-uuma, ug urban poor.
Gilauman nga ang maong kalihokan magsilbing inspirasyon ug padayon nga pakig-alayon tali sa gobyerno ug komunidad aron masiguro nga walay mabiyaan.
Ang opisina ni Senador Bong Go nagplano pa sa daghang susamang aktibidad sa ubang lugar sa nasud isip kabahin sa iyang programa nga Malasakit sa Katawhan.
Source: ZNPNN