Malampusong gipahigayon sa Local Government Unit sa Gutalac ang distribusyon sa PSA Birth Certificates niadtong Marso 2, 2026, diin 44 ka benepisyaryo ang nakadawat sa ilang opisyal nga dokumento. Gipangunahan kini ni Mayor Eddie Justin T. Quimbo isip kabahin sa paningkamot sa lungsod nga masiguro nga matag residente adunay hustong rehistro ug pagkilala sa gobyerno, sa pakigtambayayong sa Philippine Statistics Authority.
Gipakita sa kalihokan ang dakong kalipay sa mga nakadawat, ilabi na kadtong dugay nang naghulat sa ilang birth certificate. Sumala sa LGU, ang birth registration dili lamang dokumento kundili usa ka batakang katungod sa matag Pilipino nga adunay ngalan ug opisyal nga identidad isip miyembro sa nasud.
Sa termino ni Mayor Quimbo, gipakusgan ang kampanya sa birth registration sa tibuok lungsod aron mapadali ang pag-access sa edukasyon, serbisyong panglawas, ug uban pang programa sa gobyerno. Gituohan sa lokal nga liderato nga pinaagi sa hustong dokumentasyon, mas daghang oportunidad ang maablihan alang sa matag Gutalacnon.
Nagpadayon ang LGU Gutalac sa paghatag og konkretong aksyon ug malasakit sa serbisyo publiko, nga nagtinguha nga walay biyaan ug matag residente mahatagan og patas ug kalidad nga serbisyo.(JENIFFER JR. DELICA)
Source: LGU Gutalac- Public Information