Gipahigayon sa Municipality of Liloy ang turn-over ceremony sa mga nahuman nga proyektong imprastruktura nga gilauman magpalig-on sa lokal nga serbisyo, magpaayo sa farm-to-market access, ug magpadasig sa kalihokang pang-ekonomiya sa nagkadaiyang barangay. Lakip sa gi-turnover ang Multi-Purpose Building nga slaughterhouse ug Fish Processing Facility sa Barangay Baybay, ingon man daghang proyekto sa kalsada sa Barangay San Causwagan padulong sa Goaw, Cabangcalan, Comunal padulong sa Tapican, ug San Miguel.
Sumala sa lokal nga panggamhanan, ang mga proyekto nagkantidad og minilyones ka piso ug gitumong aron mapalambo ang transportasyon, mapadali ang pagbaligya sa produkto sa mag-uuma ug mangingisda, ug mapalig-on ang lokal nga industriya sa pagkaon. Gilauman nga makahatag kini og dugang oportunidad ug mas maayong serbisyo sa katawhan sa Liloy.
Ang maong mga kalampusan nahimong posible pinaagi sa liderato ni Cong. Adrian Michael A. Amatong nga nagpadayon sa pagduso sa mga imprastrukturang proyekto sa distrito, uban sa suporta ni Gov. Darel Dexter T. Uy ug mga miyembro sa Sangguniang Panlalawigan nga sila Hon. Venus A. Uy, Hon. Kay Marie P. Bolando, Hon. Jr Brillantes, ug Hon. Leo Mejorada.
Gidayeg usab ang papel ni Mayor Roberto Lim Uy Jr. sa pagdumala ug pagsiguro sa hapsay nga implementasyon ug pagkahuman sa mga proyekto, nga karon andam na nga mapahimuslan sa mga residente sa tibuok lungsod sa Liloy.(JENIFFER JR. DELICA)
Source: Municipality of Liloy