Nagtingkagol karon sa prisohan ang usa ka 42 anyos nga laborer homan masikop atol sa gikasa nga buy-bust operation sa mga personahe sa Municipal Drug Enforcement Team (MDET) sa Polanco Municipal Police Station (MPS) didto sa Purok Happy Valley 2,Brgy.Sianib Polanco, Zamboanga del Norte, mga alas 9:30 ang takna sa kagabhion niadtong Abril 19,2026.
Naila ang dinakpan nga usa ka 42 anyos nga lalaki, minyo, usa ka trabahante, ug residente sa Purok Rising Hope, Brgy. Sianib, Polanco ug laing suspek nga usa ka lalaki nga anaa sa hustong edad ug residente sa Brgy. Silawe, Polanco,ang nakaikyas human midagan padulong sa usa ka sagbotan nga lugar ug nagpabilin nga gawasnon nga nasakmitan sa gidudahang ilegal droga nga hingpit nga paglapas sa Comprehensive Dangerous Drugs Act of 2002 (RA 9165).
Atol sa operasyon nakumpiska gikan sa dinakpan ang nagkadaiyang heat-sealed transparent plastic sachet nga adunay sulod sa gituohang shabu nga mutimbang sa 1 ka gramo nga adunay kantidad nga P6,800 lakip ang mga butang nga dili druga.
Ang dinakpan gipahibalo sa hinungdan sa iyang pagkadakop ug katungod sa Konstitusyon lakip ang Miranda Rights sa usa ka pinulongan nga iyang nasabtan ug anaa na kini karon sa kustodiya sa Polanco MPS alang sa hustong disposisyon.
Samtang mga nakumpiskang droga gidala sa Zamboanga del Norte Provincial Forensic Unit alang sa laboratory examination.(MEDALYN U. BORJA)
Source: ZNPPO