Bugnaw nga prisohan ang gipadulngan karon sa duha ka indibidwal homan masikop atol sa gipatoman nga buy-bust operation sa mga tinugyanan sa balaod mga alas 11:29 ang takna sa kagabhion niadtong Abril 18, 2026,didto sa Esperanza, Brgy. Turno ning dakbayan sa Dipolog.
Naila ang mga dinakpan nga usa ka 26 anyos ug usa ka 27 anyos, parehong ulitawo, walay trabaho,nailhang puros Street Level Individual (SLI), nalambigit sa ilegal nga kalihokan sa droga isip mga pusher/ user ug residente sa Turno, Dipolog City kinsa gidakop pinaagi sa mga operatiba sa Zamboanga del Norte Provincial Drug Enforcement Unit (ZN PDEU), isip lead unit sa pakig alayon sa Dipolog City Police Station (CPS).
Nakuha gikan sa ilang posesyon ug kontrol ang nagkadaiyang heat-sealed transparent plastic sachet sa gituohang shabu nga mutimbang sa kapin o kulang 2 ka gramos nga adunay kantidad nga Php 13,600.00 uban sa mga butang nga dili drugas.
Ang mga nakumpiskang ebidensya sa droga gitugyan ngadto sa Zamboanga del Norte Provincial Forensic Unit alang sa laboratory examination, samtang ang mga nadakpang suspek anaa karon sa kustodiya sa Dipolog CPS alang sa hustong disposisyon ug pagpasaka sa tukmang kaso.(MEDALYN U. BORJA)
Source: DIPOLOG CPS,ZNPPO