Dugang kita alang sa mga trabahante ang posibleng maabot human gisusi sa usa ka Sri Lankan firm ang posibilidad sa pag-lease og 10 ka ektarya sulod sa Zamboanga del Norte Provincial Agri-Center (ZN-PAIC) sa Upper Irasan, niadtong Pebrero 15, 2026, alang sa pagtukod og coconut processing ug export facility.
Gipangulohan ang delegasyon ni Dayanka Sajith Karunanayaka sa Jaindi Exports Pvt Ltd, usa ka kompanya nga nag-eksport og mga produktong gikan sa lubi ngadto sa 72 ka nasud. Gisusi nila ang kahimtang sa yuta, imprastraktura, ug logistics aron mahibal-an ang kaangayan sa proyekto sa probinsya.
Kung mapadayun, gilauman nga makahatag ang planta og hangtod 400 ka trabaho alang sa lokal nga residente ug makapadasig sa industriya sa lubi, transportasyon, packaging, ug uban pang suportang serbisyo.
Giduaw usab sa grupo ang Nabilid Port aron susihon ang kapasidad sa pagpadala sa mga produkto gawas sa nasud, nga maoy usa sa mga importanteng konsiderasyon sa ilang pamuhunan.
Sumala sa mga opisyal sa probinsya, ang 10-hektaryang proyekto mahimong dako’g tabang sa pagpalig-on sa agrikultura ug pagpalambo sa ekonomiya sa Zamboanga del Norte, samtang nagbukas og mas daghang oportunidad sa internasyonal nga merkado.(IKEN B. GULLEM)
Source: Zamboanga del Norte Provincial News Network