Gidakop sa mga operatiba ang 4 ka indibidwal tungod sa paglapas kalabot sa ilegal nga sugal, mga alas 11:50 ang takna sa kagabhion niadtong Marso 12, 2025, didto sa Barangay Goleo, Sindangan, Zamboanga del Norte.
Naila ang mga dinakpan nalakip sa usa ka 32-anyos nga lalaki, ulitawo, ug residente sa Barangay Tuburan, Pagadian City, Zamboanga del Sur; usa ka 26-anyos nga babaye, minyo, ug residente sa Barangay Cabaluran, Midsalip, Zamboanga del Sur; usa ka 47-anyos nga lalaki, minyo, ug residente sa Barangay Poblacion, Siay, Zamboanga Sibugay; usa ka 21-anyos nga lalaki, ulitawo, ug residente sa Barangay Poblacion, Aurora, Zamboanga del Sur; ug laing 21-anyos nga lalaki, ulitawo, ug residente sa Barangay Poblacion, Aurora, Zamboanga del Sur kinsa pulos nalambigit sa ilegal nga sugal nga nailhang “Bulitsi” nga hingpit nga nakalapas Presidential Decree 1602.
Base sa impormasyon nga nadawat mga alas 11:30 sa gabii, ang mga intelligence operatives sa Sindangan MPS, mipaingon sa naasoy nga lugar diin nahitabo ang ilegal nga sugal nga walay permit.
Atol sa operasyon, nasakmit sa mga otoridad ang mga gambling paraphernalia, lakip ang tulo ka lamesa nga kahoy, kinatibuk-ang Php3,453.00 nga bet money, usa ka galon nga adunay sulod nga 48 ka plastic playing cards, usa ka pula nga 500ml nga plastik nga botelya nga adunay 80 ka gagmay nga mga bato, laing 500ml nga plastik nga botelya nga adunay sulod nga Php33.00 sa peso nga mga sensilyo, ug usa ka sudlanan nga orange.
Ang mga dinakpan gidala sa Sindangan District Hospital alang sa physical ug medical examination homan gidala gilayon kini Sindangan MPS alang sa pagpasaka og tukmang kaso. (Medalyn U. Borja)
(Source: ZNPPO)