General Santos City – NAPULO karon ka Barangay ning dakbayan sa Gensan ang taas ang kaso sa dengue nga mikabat sa kinatibuk-ang 423 ka kaso sa dengue fever gikan Enero 1 hangtud Marso 11, 2025.
Sumala kini sa talaan nga gipagawas sa City Health Office (CHO) ning s’yudad bag-ohay lamang.
Ang 10 ka Barangay nga adunay taas nga kaso sa dengue, gilangkoban ning mga mosunod:
1.) Brgy. Calumpang- 59 ka kaso
2.) Brgy. Fatima- 51 ka kaso
3.) Brgy. Labangal- 49 ka kaso
5.) Brgy. Apopong- 40 ka kaso
6.) Brgy. San Isidro- 25 ka kaso
7.) Brgy. Mabuhay- 21 ka kaso
8.) Brgy. Buayan- 21 ka kaso
9. Brgy. Tambler- 19 ka kaso
10.) Brgy. Sinawal- 15 ka kaso
Pero, gi-klaro sa CHO-GENSAN nga mas ubos ang 423 ka kinatibuk-ang ihap sa kaso sa dengue sa Gensan karong tuiga, ikumpara sa ihap sa mi-aging tuig 2024 sa susamang mga buwan nga mikabat sa kinatibuk-ang 580 ka kaso.
Gikabutyag pa nga ang mga edad nga nataptan og dengue sa Gensan gikan 6 anyos ngadto 76 anyos, pero sagad nagka-dengue ga-edad og 9 anyos.
Sa 423 matud pa ka kinatibuk-ang ihap nga nagka-dengue fever, 30% niini ang konpirmado nang nataptan sa virus nga dengue.
Apan, gikasubong gitaho sa City Health Office nga adunay usa (1) ka 2 anyos nga bata ang namatay sa dengue, gikan sa Brgy. Calumpang, Gensan.
Tungod niini, gatambag ang CHO-GENSAN ngadto sa publiko nga kung makasinati’g mga simptomas o tima-ilhan sa dengue, gilayong mo-adto sa mga FAST LANE CENTERS sa bisan diin nga Hospital sa Gensan, pribado man o pampublikong Balay Tambalanan. (Rem Agdon)
Photos/Graphics: CHO-Gensan