Malampusong napahigayon ang ikatulong Quarterly Meeting sa Dipolog City Youth Development Council (DCYDC) niadtong Agosto 1, 2025, Biyernes, didto sa Gallery 4, Museo ning dakbayan sa Dipolog.
Gisalmotan kini sa 12 ka Youth ug Youth-Serving Organizations nga naglangkob sa mga School-Based ug Community-Based Organizations, lakip ang mga core members sa Local Youth Development Council (LYDC).
Gitutukan sa maong miting ang preparasyon alang sa umaabot nga Linggo ng Kabataan 2025, nga ipahigayon karong Agosto 12, lakip na ang mga kalihokan nga pagalahukan sa mga kabatan-onang Dipolognon. Gihisgutan usab ang mga exciting nga events nga ipatuman isip kabahin sa selebrasyon sa maong semana.
Dugang pa, mipresentar ang City Youth Development Office og napapanahong status sa mga organisasyon nga narehistro sa Youth Organization Registration Program (YORP) ilawom sa ilang portal. Gilatid usab ang estado sa aplikasyon sa mga lokal nga youth organizations ngadto sa YORP sa National Youth Commission (NYC).
Gipahigayon usab sa sekretarya ang finalisasyon sa mga gi-endorso nga representante sa matag youth organization, nga magsilbing basihan sa Reconstituted Members sa LYDC, subay sa Executive Order nga gipagula sa bag-ong Local Chief Executive sa lungsod.
Ang padayong pagtigom sa mga youth organizations sa lungsod usa ka dakong pamatuod sa ilang tinud-anay nga dedikasyon sa pagpalambo sa kabatan-onan, pagpalig-on sa panaghiusa, ug pagtukod og lig-on nga kolaborasyon tali sa mga aktibo nga youth groups sa Dakbayan sa Dipolog.
Nagtapos ang miting pinaagi sa pag-apod-apod sa bag-ong LYDC uniforms ngadto sa tanang opisyal nga miyembro sa konseho.(Jumalisa Papa)
Source: Dipolog City Youth Development Office