Wala maka iskapo sa kamot sa mga tinugyanan sa balaod ang usa ka 39 anyos nga kawatan homan masikop sa mga personahe sa kapulisan atol sa gikasa nga operasyon mga alas 9:30 ang takna buntag niadtong Abril 5, 2026, didto sa Purok Saging, Barangay Barcelona, Dapitan City, Zamboanga del Norte.
Ang maong dinakpan naila nga usa ka 39 anyos, minyo, usa ka drayber, ug residente sa Barangay Marapong, Sergio Osmeña, Zamboanga del Norte, kinsa mao ang gituohang nagkawat sa upat ka mga manok pang-itsa nga gipanag-iyahan sa usa ka 63 anyos nga reklamante, minyo, ug residente sa nasangpit nga lugar.
Nasayran nga ang insidente nadiskobrehan mga alas 3:00 sa kaadlawon sa samang petsa, ug dali nga girespondehan alas 9:35 sa buntag, sa mga personahe sa Dapitan City Police Station (CPS) nga miresulta usab sa pagkadakop sa suspek.
Sa inisyal nga imbestigasyon, nadiskobrehan sa reklamante nga mga alas 3:00 sa kaadlawon dihang iyang namatikdan ang pagka wala sa iyang upat ka manok pangbugsay, nga gitipigan sa iyang nataran, ug gituohang gikuha sa wala mailhing suspek.
Tungod niini dali nga miresponde ang mga otoridad ug mipahigayon gilayon og imbestigasyon.
Sa pakigsusi ang mga otoridad nakadawat og impormasyon kabahin sa usa ka indibidwal nga giingong namaligya og mga manok sa Munisipyo sa Sergio Osmeña ug diha-diha dayun gihimo ang koordinasyon sa lokal nga pulisya sa maong munisipyo, nga miresulta sa pag-ila sa suspek ug pagbawi sa mga kinawat.
Positibo nga giila sa nagreklamo ang nabawi nga mga manok pang-ihaw isip iyang nawala nga kabtangan.Nakuha usab gikan sa posisyon sa suspek ang upat ka manok pang-ihaw ug usa ka kanding.
Ang suspek gipahibalo sa hinungdan sa iyang pagkadakop ug mga katungod sa konstitusyon, lakip ang iyang mga katungod ubos sa Anti-Torture Act, sa usa ka diyalekto nga iyang hingpit nga nasabtan ug kasamtangang anaa na kini sa kustodiya sa Dapitan CPS alang sa pagpasaka sa angay nga mga kasong kriminal.(MEDALYN U. BORJA)
Source: ZNPPO