Dako ang pasalamat nga gibati sa usa ka 30 anyos nga biktima sa aksidente gikan sa Barangay Domogok, Siayan, nga mipadayag ngadto kang Gobernador Darel Dexter Uy tungod sa medikal nga tabang nga nakatabang kaniya nga maagian ang kritikal nga operasyon ug padayon nga pag-ayo sa iyang kahimtangan.
Si Francisco Estocado Deguiñon Jr. grabe ang naangkon nga kadaot human sa usa ka aksidente niadtong Marso 13, 2024. Lakip sa iyang mga sakit ang septic non-union sa wala nga tibia ug left eye nasal primary pterygium (G1T1). Tungod sa kaseryoso sa iyang kahimtangan, nangayo siya og tabang pinaagi sa Zamboanga del Norte Medical Team nga nakabase sa Zamboanga del Norte Medical Center (ZNMC).
Pinaagi sa suporta ni Gobernador Uy, dali nga naasikaso si Deguiñon ug gipadala sa Vicente Sotto Memorial Medical Center sa Cebu City, diin siya malampusong naoperahan niadtong Nobyembre 17, 2024. Human sa operasyon, padayon siyang gihatagan og medical monitoring ug assistance sa ZNMC Medical Team nga gipangulohan ni Ms. Herdina Gallegos.
Niadtong milabay nga adlaw, mibalik si Deguiñon sa Dipolog City gikan sa Cebu sa wala pa mopauli sa Siayan aron ipadayon ang iyang recovery, personal nga kining nakigtagbo kang Gobernador Uy aron ipadayag ang iyang pasalamat sa tabang nga dakong bahin sa iyang pagkaayo.(IKEN B. GULLEM)
Source: Zamboanga del Norte Provincial News Network