Mokabat 200 ka alagang hayop, lakip ang 174 ka iro ug 26 ka iring, ang nabakunahan batok rabies sa bag-ong hugna sa mass anti-rabies vaccination sa City Government of Dapitan, ubos sa pagpangulo ni Mayor Evelyn T. Uy.
Sumala sa City Veterinary Office, 80 ka iro ug 16 ka iring ang nabakunahan sa Brgy. Linabo, samtang 94 ka iro ug 10 ka iring usab ang nakaangkon og libre nga bakuna sa Brgy. Potol, isip kabahin sa padayong kampanya batok sa rabies sa dakbayan.
Ang libreng anti-rabies vaccination ipadayon sa tibuok bulan sa Pebrero 2026, aron mas daghang pet owners ang mahatagan og sayon ug duol nga serbisyo sa ilang mga barangay ug mapanalipdan ang komunidad gikan sa usa ka makamatay apan malikayan nga sakit.
Gidapit sa LGU ang tanang tag-iya sa iro ug iring nga tulo ka bulan pataas nga dad-on ang ilang mga alagang hayop sa giiskedyul nga vaccination days sa matag barangay, isip kabahin sa responsableng pag-atiman sa hayop ug panalipod sa kahimsog sa katawhan.
Pinaagi sa panaghiusa sa LGU ug komunidad, padayon ang Dapitan City sa pagpalig-on sa tumong nga rabies-free nga dakbayan, diin ang matag bakuna nagpasabot og usa ka kinabuhi nga naluwas ug usa ka panimalay nga mas luwas.(IKEN B. GULLEM)
Source: City Government of Dapitan