Gitapos sa Regional Police Security Batallion (R-PSB) Team sa 2nd Zamboanga del Norte Provincial Mobile Force Company (ZNPMFC) ang tulo ka adlaw nga seminar ug praktikal nga kalihokan sa organic farming pinaagi sa preparasyon sa yuta ug seremonyal nga pagtanom sa mga punuan sa Lakatan banana sa Barangay Mamawan, Baliguian, Zamboanga del Norte.
Gipangunahan ang maong inisyatibo sa R-PSB Team ubos sa pagdumala ni PLTCOL Edwin D. Verzon, diin gitumong ang pagpalig-on sa kahibalo sa mga mag-uuma bahin sa malungtarong pamaagi sa pag-uma.
Sa ikatulong adlaw sa programa, gisentro ang kalihokan sa praktikal nga aplikasyon sa mga leksyon nga natun-an sa unang duha ka adlaw. Nagkahiusa ang mga miyembro sa R-PSB Team ug ang Mamamawan Alsa Masa Farmers Association sa pagluag sa yuta, hustong distansiya sa pagtanom, ug paggamit sa mga organic concoctions nga gihimo atol sa seminar aron masiguro ang maayong pagtubo sa mga tanom.
Gisuportahan usab ang kalihokan ni Barangay Chairman Glenn Pascual ug Jun Alfonso T. Benlot, nga nagpakita sa lig-on nga panagtambayayong tali sa komunidad ug mga ahensya sa gobyerno.(IKEN B. GULLEM)
Source: Zamboanga del Norte 2nd PMFC