Malamposong gipahigayon ang 2nd Quarter Meeting sa “City Development Council” buntag sa Hunyo 23.
Ang nasangpit nga tigum ang gipangunahan ni City Mayor Darel Dexter T. Uy, isip Chairman sa City Development Council ning siyudad uban nila ni City Vice Mayor Senen O. Angeles, konsehal Julius B. Gajonera ug Romulo P. Soliva, uban usab sa mga Punong Barangay sa 21 ka mga barangay sa Dipolog ug mga pipila ka personahe gikan sa kagamhanang lokal ning siyudad ug mga representante gikan sa Civil Society Organizations.
Atol sa maong tigum, gituki pinaagi ni City Planning Development Coordinator, Engr. Albert S. Alimpulos ang kalabot sa pagpa-aprobar sa 20% Development Fund Program sa dakbayan alang sa tuig 2024, nga nagkantidad og mokabat sa 191, 532, 963.20 ka pesos, diin nasayran nga kining maong kantidad ang paga-gamiton alang sa pagpatuman sa nagkalain-laing mga developmental programs sa atong dakbayan nga gilangkoban sa Social, Economic ug Environmental programs.
Sigun sa dugang nasayran nga ilawom sa tulo ka nag-unang mga developmental programs, aduna usab kini mga nakahan-ay nga programa, diin ilawom sa Social Development Program, nakahan-ay ang a) purchase of Land for developmental projects, b) Relocation of Informal settlers, c) City Housing Project sa Barangay Gulayon, d) COVID 19 Related expenses ug e) construction of Corazon C. Aquino Hospital.
Samtang ang Economic Development Program, ang gilangkoban sa a) Tourism Developmental Projects, b) Opening/concreting of roads c) construction of Galas Port ug lain pang pito ka mga programa ilawom niini.
Samtang atol gihapon sa maong tigum, malamposon usab nga gi-aprobahan sa City Development Council ning siyudad ang CDRRMC resolutions nos. 01-2023, 02-2023 ug 03-2023, uban usab sa Annual Youth Development Action Plan alang sa tuig 2024 sa Katipunan ng mga Kabataan ilawom sa mosyon nga gipadas-ug ni Barra Punong Barangay, Moman Apura.
(Source: Dipolog City Government Facebook page)