Nakabenepisyo ang 29 ka mga bata gikan sa nagkalain-laing lungsod sa Zamboanga del Norte sa libreng pediatric check-up nga gipahigayon sa Zamboanga del Norte Medical Center sa Dipolog City niadtong Pebrero 4, 2026. Ang kalihokan kabahin sa Free Medical Check-Up ug Surgical Mission nga gisuportahan sa probinsyal nga pangagamhanan.
Ang programa gipadagan ubos sa liderato ni Governor Darel Dexter T. Uy ug sa administrasyon sa ZNMC nga gipangulohan ni Hospital Administrator Dr. Esmeralda A. Nadela, kauban ang medical team sa ospital. Tumong niini ang paghatag og libre ug dekalidad nga serbisyong medikal ilabi na sa mga bata gikan sa pamilyang kulang og ikagasto.
Gipahayag sa mga ginikanan ang ilang pasalamat tungod kay dako ang natabang sa programa sa pag-atiman sa panglawas sa ilang mga anak. Matud nila, nakapamenos kini sa ilang gastohanong medikal.
Magpadayon ang serbisyong medikal sa mosunod nga mga adlaw alang sa adult surgery ug OB-Gyne cases sa ZNMC, isip kabahin sa padayon nga paningkamot sa probinsya nga masiguro nga walay mabiyaan sa serbisyong panglawas.(JENIFFER JR. DELICA)
Source: Zamboanga del Norte Provincial News Network