Gibanabanang 280 ka mga mag-uuma ang nagkatigum sa Yellow Corn Derby Field Day nga gipahigayon sa Barangay Sianib, Polanco, aron masaksihan ug makat-on sa pinakamaayong pamaagi sa pagdumala sa produksyon sa mais, gikan sa pagtubo hangtod sa pag-ani.
Ang maong aktibidad nagtinguha sa pagpalig-on sa kahibalo ug teknolohiya sa mga mag-uuma aron mapaayo ang kalidad ug kadaghan sa ilang ani.
Gipasiugdahan niini ang maayong praktis sa pagpananom sa yellow corn, lakip ang hustong paggamit sa abono, pagtino sa kalidad nga binhi, ug episyenteng pag-atiman sa tanom.
Sa derby, gipakita sa mga partisipante ang ilang mga estratehiya sa produksyon ug teknolohiyang pang-agrikultura nga makatabang aron makab-ot ang labing taas nga ani ug kalidad sa mais.
Miapil sa maong kalihokan ang nagkadaiyang kompanya sa binhi sama sa: Bioseed Research Philippines Inc., Evo Gene Seeds Corporation, Vigour Seeds Development Inc., Asian Hybrid Seed Technologies, Inc., AKTIV Multi Trading Co. Phils. Inc., Syngenta Philippines Inc.
Sumala sa mga opisyal sa Department of Agriculture, ang Yellow Corn Derby usa ka platform alang sa inobasyon ug kolaborasyon, diin ang mga mag-uuma makakat-on direkta gikan sa eksperto ug sa mga kompanya sa binhi bahin sa bag-ong teknolohiya, sustinableng praktis, ug epektibong pagdumala sa yuta.(Iken B. Gullem)
Photo courtesy: Department of Agriculture ZAMPEN