Malampusong gibuhian sa City Environment and Natural Resources Office (City ENRO) ang 26 ka hatchlings sa Olive Ridley sea turtle ngadto sa dagat sa Dipolog Boulevard, kaniadtong Pebrero 25 Ning kasamtangang tuig.
Gipahigayon ang kalihukan human makadawat og report gikan sa mga personahe sa Dipolog Boulevard bahin sa presensya sa mga gagmayng pawikan sa daplin sa baybayon. Gilayon nga miresponde ang City ENRO aron beripikahon ang lugar ug ilang nadiskubrehan ang salag diin nakit-an ang 97 ka napikas nga itlog.
Ang Olive Ridley sea turtle usa ka protected species ubos sa Republic Act No. 9147 o ang Wildlife Resources Conservation and Protection Act, ingon man sa City Ordinance No. 26-361.
Sumala sa City ENRO, ang hustong pagdumala ug pagpanalipod sa marine wildlife nagpakita sa lig-on nga paningkamot sa siyudad sa pagpreserbar sa biodiversity ug pag-amuma sa coastal ecosystems.(IKEN B. GULLEM)
Source: Dipolog ENRO